澳門地圖初次到澳門，用了兩日時間，
把澳門主島的大環、旅遊塔、東望洋塔、漁人碼頭都用雙足走了一遍。
一去到澳門，感覺其實同大陸分別唔係話好大，
因為呢個月澳門好多活動，所以真係爆多人，
醒目既Iris一行到的士站，係先見到架帶到我地去目的地既巴士，
於是乎我地就坐巴士，你唔好傻到拎百達通出來DO，係唔得既。
去到氹仔，就直接行左去小飛象，
佈置係幾好既，食物就一般般喇，既無葡國特色，亦都無過人既環境，
不過最後既葡撻應該爭番唔少分，居然又真係有肉桂粉架喎，
不過取然無我學整餅果度咁正拉。
食飽飽就直踩去威尼斯人睇下咩咁把炮拉，
外型．．．真係唔見得有幾吸引，不過入到去，真係幾豪華，
無論係吊燈到璧畫，感覺都好金光閃閃，
只係因為太多人，賭場又比較多人抽菸，所以根本係無心情欣賞架，
至於果條運河．．．你都唔好話唔失望唔無聊，
不過不得不提，入面划船既船工係真係識唱歌，歌劇果種！
雖然威尼斯人可能真係好大好豪，不過我唔認為佢係香港會議展覽中心既對手，
因為交通實在太差，如果唔係響的士站，想搵架的士都難。
點解澳門唔起番條地鐵架？！
得果兩三個鐘，拿拿林就去左大三巴走個轉先，
居然唔覺意見到潘榮記，緊係買番個金錢餅先拉，
原來真係升左價十倍，以前一盒五蚊雞，家下要四十蚊，
老老實實，好一般喎，又唔係即刻整，真係幾失望。
對大三巴最好既印像係個地板，真係好有味道，
而且咁多人既一條街，算係好乾淨。
截左四五個字先截到的士，好彩截唔到的士既仲有老板，
所以遲到都無人過問，不過再一次證明，有錢唔係大哂架！！
無的士又無巴士你係吹佢唔脹架，有本事你可以行去。
澳門旅遊塔個View真係唔錯既，如果唔洗錢都真係可以上來走個圈。
不過所謂既360轉圈，只係個食野既果個圈響度轉．．．取巧。
辦完所有公事，大家各自散水，
我地就行左去好舒服既南湖，唔知點解呢到咁靚咁靜都無人去，
不過亦都突然有一陣寂寞既感覺。
見時間唔早，都係時候過關閘，
途中我地討論緊一個地方的名稱，好心既澳門乘客主動為我地解答，
其實都唔係第一次，令到我對澳門既印象真係幾好。
由關閘去珠海拱北，因為有港澳通道，所以係好快架，
同埋如果你想去珠海過夜而要求又唔係好高，
基本上都唔洗訂房，去到問價就可以喇，會比訂房平。
而且都唔洗點擔心，一出閘向前直行，沿住迎賓南路兩邊都係旅館酒店。
不過由拱北番來澳門就真係最好早少少，因為今次只有澳門通道，
即係話係無香港居民既通道．．．
由拱北打的去大三巴大概係二十多元，而我地就先去炮台行個圈，
其實香港都有炮台遺址，但係真係唔似得人地維護得咁好，
香港果ｄ會搞到好似新既一樣，就好似中國響紫禁城加個噴水池一樣咁令人髮指！
於是我地就一直由炮台，行去大三巴，行埋去勝利食佢隻豬，仔包，
再行去玫瑰堂，過番去主教山。
其實大環呢個舊區先真係大部份澳門人居住既地方，
清一式唐樓，幾間唐樓就係一個里，一條街我閒閒地都見到六七個里。
其實見到ｄ電線吊來吊去係幾驚架。
去到主教山見到人影結婚相，真係幸福．．．
俾對香港人叫左我幫佢地影相，佢居然問我個閃光燈點開．．．
唉，有好多人花得起錢買但係唔係影相，難為我．．．花唔起。
好彩我都唔識影相架者，居然開左閃燈但係快門1/250．．．咁開閃燈來做咩！
打的由主教山去東望洋塔都係二十幾蚊，
東望洋塔真係令我太失望喇，仲要咁多亂拋垃圾既內地人，
咩心情都無哂拉。
最後一程係去漁人碼頭，呢個沿海既建築群，其實都幾靚架，
不過唔知點解無咩人去，或者來澳門既人都真係來賭場，
一唔係就係食，所以漁人碼頭係空空的，不過原來入到去，
睇下睇下都幾平平無奇．．．不過難得清靜，都幾好既。
有咩值得食？
三盏燈既緬甸野，木糠布甸。
